Ørsta Kommune Teknisk sektor Rådhuset 6150 Ørsta Digernes, 23. august -06 Vedr. deponering av overskotsmasse i gruvesjakt. Gnr/bnr 59/2 Dykkar ref. PLN/WANGEN Eg viser til Dykkar brev av 16.8.06 der De held fast på kravet om at eg skal sende søknad om tiltaket, og betale handsamingsgebyr. Først nokre kommentarar til tidlegare brev: Eg sende melding om tiltaket den 25. juni og fekk svar 24.juli. Etter det eg forstår tilseier reglane at svarfristen for slike saker er 3 veker, og det var såleis gjort ein saksbehandlingsfeil frå Dykkar side. I brevet viser De til kommuneplan, sone C og sone D. Eg er ikkje orientert om at det fins ein godkjent kommuneplan som plassere min eigedom i slike ”soner”, og eg ber om forklaring på kva som ligg i desse begrepa, og kva som er gjeldande kommuneplan for dette området. Vidare hevdar De at ”tiltaket er avhengig av dispensasjon”, og at ”tiltaket er søknadspliktig”. Eg ber om å få nærare grunngjeving for desse utsegnene, med henvisning til dei reglane som er blitt nytta. De nemner også at nabovarsel må sendast i ”naudsynt omfang”. Eg har sendt varsel til Magne Krøvel som har eigedom som grensar opp til gruvesjakta. Eg ber om å få oppklart kven andre som må varslast. Så til Dykkar siste brev av 16. august: De skriv der at De har drøfta saka med Kolbjørn Megård i Areal- og miljøavdelinga i Møre og Romsdal Fylke, og at han vurderer det slik at saka ikkje treng handsaming  i fylket. Seinare skriv De så at saka må sendast på høyring m.a. til Møre og Romsdal fylke. Kva skal fylkesadministrasjonen gjere vurdering på? Det melde tiltaket kan vel umogeleg ha fylkespolitiske konsekvensar?  I brevet skriv De at De ønskjer ”nærare opplysningar i høve dei tilhøva som var omtala i brev av 24.juli.  Eg meiner at eg har gitt grundige opplysningar om tiltaket i mine to brev, og ber om å få spesifisert kva som er sikta til. Eg må elles stille meg uforståande til at De held fast på vedtaket om ”søknadsplikt”, og eg er særs skuffa over å oppleve at Ørsta kommune v/Teknisk Sektor praktiserer ei, etter mi meining, særs byråkratisk og stivbeint tolking av reglane. Eg finn grunn til å minne om at dette tiltaket, frå mi side ikkje er tenkt gjennomført grunna økonomiske tilhøve, men eine og åleine for å løyse eit miljømessig problem som berører både meg og andre som måtte ferdast i området. Samstundes får firma K.A. Aurstad høve til å bli kvitt overskotsmasse på ein miljømessig god måte, i staden for å måtte legge opp store, åpne deponi som både tek opp verdfullt areal og vil bli skjemmande i naturen. Det er óg underleg, tykkjer eg, at Teknisk Sektor i Ørsta kommune finn grunn til å bruke tid og resursar på ei slik sak; eg trudde at administrasjonen hadde lang viktigare saker å stelle, og eg tillet meg å setje eit spørsmålsteikn ved arbeidsmåten og prioriteringane til Teknisk Sektor. Med helsing Rigmor Digernes Furseth
Dokument: Gruvesjakta_brev2308.htm